لو أنت خريج حقوق، وبتدور على شغل، لقيت أن البنوك بتطلب خريجين حقوق، لو عايز تعرف خريج حقوق يشتغل ايه فى البنك وايه علاقة الحقوق بالتجارة والأموال؟
فعلاً، البنوك بتحتاج دايمًا لخريجين حقوق، والمهام بتاعت خريجين حقوق فى البنوك محددة ملهاش علاقة كبيرة بالمعاملات المالية، ولكن هو بيساعد أن المعاملات المالية تتم بشكل قانوني لحماية حقوق البنك وحقوق المستخدم.
وعلشان تتعرف على كل الشروط والمهام بالتفصيل وشكل الوظيفة لك كخريج حقوق فى البنك، كمل قراءة المقالة دي علشان تعرف لو كنت تصلح أنك تكون من العاملين فى البنك ولا الشروط لا تنطبق عليك.
إزاي خريج حقوق يشتغل في بنك؟
الموضوع فى الأول والآخر بيعتمد على أنك تكون خريج حقوق، وده لأنك هتهتم بأمور البنك القانونية، لأنك خلال دراستك في كلية الحقوق، هتكون اتعرفت على كل الحقوق والقوانين المطبقة في البلد، وبالتالى هتكون الممثل الرئيسي للبنك فكل ما يتعلق بالقوانين والتشريعات علشان البنك ميتعداش على حق أى حد من العملاء ولا حد من العملاء يتهم البنك من الباطل.
شروط تعيين خريج حقوق في البنك
علشان تتقبل فى أى بنك وتتولى أمور البنك القانونية، فى شوية شروط لازم تتأكد أنها بتتوافر فيك ولا يجوز أبدًا أنك تخل بأي شرط من الشروط.
يلا بينا نتعرف على الشروط، وطبعًا خليك فاكر أن الشروط دي بتختلف من بنك للتانى ولكن فى بعض الشروط مفيش أى بنك بيختلف فيها أبدًا:
- أولا والشرط الأهم هو أن تكون خريج كلية الحقوق من الجامعات المصرية أو الكليات المعادلة للمجلس الأعلى للجامعات.
- تقديرك فى سنوات دراستك الجامعية لازم يكون على الأقل جيد، ولكن فى بنوك تانية بتشترط أن التقدير يكون جيد جدًا على الأقل. لازم تتأكد من الإعلان كويس قبل ما تبعت أوراقك لأى بنك.
- من القوانين الصارمة فى أى بنك هى أن لا يكون لك حد من الأقارب لحد الدرجة الثالثة بيعمل فى نفس البنك.
- سنك من الشروط المهمة جدًا، أقصي سن للتقديم هو 28 عام أو 27 عام على حسب كل بنك.
- بيانات بطاقة الرقم القومى تكون متطابقة مع الواقع، يعني عنوانك فى البطاقة لازم يكون زي عنوانك الحالي.
- معرفة الحاسب الآلى بشكل جيد جدًا ، لأن الشغل حاليًا بقى معتمد بشكل كلى على الكمبيوتر.
- مهاراتك الخاصة من الشروط المهمة فى تعيينك فى البنك وأهمها هي التواصل مع الآخرين بشكل مناسب علشان تقدر بكل سهولة تتعامل مع فريق العمل بتاعك وتوصلوا لهدف البنك بكل سهولة.
- اللغة الإنجليزية هي اللغة الرئيسية دلوقتى فى أى بنك وفى أى مهنة بصفة عامة، علشان كده لازم تتعلم كويس اللغة الانجليزية وتكون متقنها.
قرأ المزيد عن : متطلبات وظائف البنوك
اشكال الوظائف لخريج حقوق في البنك
اتعرفنا مع بعض عن الشروط علشان خريج الحقوق يشتغل في البنك، دلوقتى جيه وقت أننا ننتقل لنوع الوظيفة وشكلها. بشكل كبير، أنك خريج حقوق، فأنك بالتأكيد هيكون مهنتك فى البنك بتدور حول مسئول الشئون القانونية للبنك، وطبعًا لأن البنك كبير وله فروع كثيرة وفي أماكن مختلفة وبيخدم عملاء كثير، بالتالى قسم الشئون القانونية مش هيكون مكون من عدد صغير من الأشخاص، بالعكس طبعًا قسم الشئون القانونية من الشئون الكبيرة جدًا فى أى بنك، ويتقسم لأقسام فرعية كمان. وكل قسم مسئول عن جزء معين، وده اللى هنتعرف عليه كمان شوية فى جزء مهام خريج الحقوق فى البنك.
من الناحية التانية، لأنك خريج حقوق، فأنت أكيد خلال فترة دراستك، درست الاقتصاد والقانون التجاري وجزء مخصص علشان تقدر تعمل ميزانية سنوية وبتكون على دراية تامة بأجزاء كثيرة من عالم المال والبنوك. وبالتالى، هتقدر بكل سهولة تفهم كل حاجة ليها علاقة بالبنك ومصطلحاته وإزاي البنك بيتم العمل فيه، والهدف من أنك تدرس الجزء ده فى كليه الحقوق هو أنك تقدر تكون جزء من البنوك أو أى مؤسسة محتاجة استشارات قانونية متعلقة بالأمور المالية.
اقرأ المزيد عن : اقسام الوظائف في البنوك
مهام و مسئوليات خريج حقوق في البنك
قررت أنك تكون جزء من أفراء البنك، بس لسه مش عارف ايه هى المهام بشكل واضح وصريح، ولسه بتسأل خريج حقوق يشتغل ايه في البنك. دلوقتى وفى خلال دقائق هتعرف كويس ايه هى المهام اللى هتكون مطلوب منك إنجازها في البنك.
- أول حاجة ولأنك خريج حقوق، بالتالى أنت هتكون مسئول عن حل كل المشاكل القانونية للبنك والفروع المختلفة، يعني لو عميل رفع قضية على البنك، فأنت مسئول عن دراسة المشكلة وحلها وكسب القضية، أو فى حالة أن البنك مخطئ، بالتالى أنت بتبدأ تعرض الحلول علشان إرضاء العميل وبالتالي إنهاء القضية.
- ولأنك على دراية بالقوانين، وتعرف إزاي ممكن كتابة عقد يضم كل الحقوق والواجبات للطرفين، فأنت هتكون مسئول عن كتابة العقود المختلفة للبنك بشكل يضم كل الشروط بشكل واضح وصريح من دون أى تعقيد، والهدف من أن العقد يكون مكتوب بشكل قانوني، هو ضمان لحقوق البنك بشكل سليم.
- المهمة الثالثة هي مهمة متعلقة بالمهمة الثانية، هو أنك هتشرف على توثيق العقود، علشان تتأكد من أن العقود تم توثيقها بشكل قانوني سليم، علشان تتفادي أي مشكلة قانونية للبنك.
- دورك ومهنتك مهمة جدًا فى أي بنك، وده لأنك هتحافظ على البنك من أى عملية نصب، من خلال أنك هتقوم بفرض القوانين والشروط للاقتراض من البنك، وبالتالي على المقترض أنه يستوفي كل الشروط دى، بهدف ضمان حقوق البنك. والشروط دي بتكون عبارة عن تحديد السن، والوظيفة والغرض من القرض ونسبة القرض وفقًا لكل الظروف، وفى حالة أن المقترض لم يقم بسداد القرض، إيه هى الإجراءات اللازمة علشان تضمن حقوق البنك، وفى حالة أن المقترض يرغب في سداد القرض مرة واحدة وإنهاء التقسيط، وبالتالى لازم يكون فى نص فى الاتفاق عن طريقة إنهاء التعاقد. بالشكل ده، أنت لازم تحط كل الافتراضات لأى عملية اقتراض أموال من أى عميل أو شركة والهدف الرئيسي هو ضمان كل حقوق البنك القانونية.
- تشريع القوانين الداخلية داخل البنك بين الموظفين والعمل على تطبيقها، لأن ممكن الخلل فى البنك يكون بسبب فرد من الأفراد العاملين في البنك، بالتالى لازم تقوم بتشريع قوانين داخلية ولائحة للبنك وكل خطأ له عقابه الواضح والصريح لتفادي أي مشكلة للبنك بسبب فرد.
- متابعة التحقيقات القانونية داخل البنك فى حالة أن أحد العاملين خالف اللائحة القانونية. والمتابعة من خلال أنك تتأكد من المتهم بأى مشكلة هو من قام بها بالفعل، ومن خلال كل الطرق والسبل الممكنة. ولو أثبت الخطأ، متابعة معاقبة العامل.
الست مهمات السابقات هم الإجابة عن سؤالك خريج حقوق يشتغل ايه في البنك ؟ ولكن طبعًا كل المهام دى مش هتقوم بيها لوحدك، لأن كما وضحنا منذ قليل، أن قسم الشئون القانونية به أقسام عديدة، كل قسم مختص عن جزء معين ومن الأقسام دي:
- قسم العقود
- قسم تدقيق المعاملات القانونية
- قسم التظلمات و التحقيقات
- قسم القضايا
- قسم مباشرة القضايا وتنفيذ الأحكام
- قسم دراسة مشاريع القوانينا
اقرأ المزيد عن : أهم شروط وظيفة خدمة العملاء في البنوك
فى النهاية، علشان تكون عضو فى بنك وأنك خريج حقوق، الموضوع مش صعب ولكنه يحتاج صبر وعزيمة، متفقدش الامل وهتوصل لحلمك بكل سهولة وتكون المسئول عن الشئون القانونية للبنك. وكمان ممكن تنضم لموقع Jobs In Deep علشان تنمي مهاراتك القانونية وتكتسب خبرات وكمان هتلاقى وظائف خالية في البنوك المختلفة.
